|
TUSAGASSIUUTINUT NALUNAARUT
Miami, ull. 19. Marts 2009
Takornariartitsisartut pissangasut Miami-mi iluatsitsilluarnissaminnik kissaatillit
Kalaallit Nunaanni takornarianik sullissisut qulingiluat sapaatip akunnerani uani peqataajartortinneqarput silarsuaq tamakkerlugu umiarsuanik angallassisartut saqqummersitsineranni, Cruise Shipping Miami, ulluni 16.-19. marts umiarsuakkut angallassisartut illoqarfiit pingaarnersaanni.
Kalaaleq peqataasoq , Pitsi Høegh Qaqortumiit, ukiut pingasut ingerlatiinnarlugu peqataavoq. Ukioq mannali allaaneruvoq Pitsi Høegh oqarpoq.
- Umiarsuakkut takornariartitsineq pingaarnertut aningaasatigut isertitsivigaarput Qaqortoq Tourist Service-mut. Suliffeqarfipput ingerlasinnaanngilluinnarpoq umiarsuit tikinneq ajorunik maanga, nangillunilu:
- Ukioq manna aarlerivugut piffimmut aggersumut. Aningaasatigut perulunneq umiarsuaatillit tamaasa eqqormagit, aammalu akiliutaasartoq ilaasumut ataatsimut qaffassimammat 17 %-mik 525 kr-ninngorluni. Annilaangassutigivarput umiarsuuatillit ataasiakkaat Kalaallit Nunaat ornittarunnaassagaat akisugalugu, Pitsi Høegh nassuiaavoq.
Aarlerinerlu ilumooruteqarsinnaavoq, Suliniutinut attaveqaqatigiinnermullu pisortaq Anders U. la Cour Vahl oqaaseqarpoq.
- Nalunngilarput umiarsuaatilik ataaseq aaliangersimagaa Kalaallit nunaannut angallassinianngitsoq akitsornera pillugu, umiarsuaatiliuvorlu ukiorpassuarni tikisitsisartoq, Anders U. la Cour Vahl oqarpoq.
Paasissutissiillunilu umiarsuaq ataaseq Amerikamiit tikittoq soorlu Qaqortumut, 1 million kr.-nik akiliisartoq akileraarutaannarnut.
Taakkulu qaavatigut isertitat allat, pisiniarfeeqqat sanalukkanik isertittagaat, angallassinerit allallu kiffartuussinerit umiarsualivinniit angallassisartuniillu.
Cruise Shipping Miami tamaat ataatsimut isigilersippai suut ilanngussuiffigineqarnerpaajunersut umiarsuakkut angallassisartuni, Kalaallillu takornariartitsisartut periarfissillugit tuniniaanerminni annertusaassallutik isumaqatigiissuteqarlutillu umiarsuaatilinnut USA-miit Europa-miillu. Saqqummersitsineq sisamanngornermi naavoq.
----
Paassissutissat annertunerusut pissarsiarineqarsinnaapput ukununnga saaffiginnilluni: Pitsi Høegh oqarasuaat 49 37 41, e-mail pitsi@qaqtourist.gl imaluunniit Anders la Cour Vahl oqarasuaat 55 25 34, e-mail anders@greenland.com
|
/Miami_Seatrade_deltagere.jpg)