Printervenlig

Northern Periphery Programmimut sisamassaannik qinnuteqarfissaq

Sisamassaannik Northern Periphery Programme 2007-2013-imut (NPP-mut) qinnuteqarfissaq tulleq tassaavoq 18. marts 2009.

Tamatumunnga atatillugu qinnuteqarfissat tallimassaannut qaaqqusissut aatsaat 2010-mi upernaakkut pissasoq sianigeqquneqarpoq.

NPP tassaavoq EU-mi suliniut, ataatsimoorussatut ajornartorsiutinik aallaaveqartoq, Ississumi Atlantikullu Avannaani najugaqarfikitsut makkununnga atatillugit misigisaqarfigisagaat:

    - Inuussutissarsiutinik ineriartortitsineq
    - Nutaaliorsinnaassuseq
    - Unammillersinnaassuseq
    - Nammatsisumik ineriartortitsineq
    - Angallanneq
    - Takornariaqarneq
    - Ilisimatusarneq
    - Ilinniartitaaneq il.il.

Qulaani pineqartunut tunngasunut suliniutinut tapiiffigitinnissamik qinnuteqartoqarsinnaavoq. Suliniutinik makkuninnga suliaqarfiusunik qinnuteqarfissami matumani immikkut akuersaartoqartussaavoq:

- Ungasissutsinik annikillisaaniarluni paasissutissiinikkut attaveqaqatigiinnikkullu teknologiip atugarinera.

- Silap pissusaani atoruminaatsuni angallannikkut attaveqarfiit ineriartortinnissaannut aserfallatsaalinissaannullu nutaaliatut tunisassiat sullississutitigullu aaqqiissutissat ineriartortinneri.

- Inuiaqatigiinnut avinngarusimasunut iluaqutaasussanik – assersuutigalugu immakkut aqqutinik nutaanik – angallannikkut aqqissuussiffinnik ineriartortitsinerit.

- Immikkoortortanut issittumi atugassarititanik atoruminaatsoqarfiusunut atatillugu immami angallannermi isumannaallisaaneq.

- Sullississutitigut aaqqiissutissanut nutaanut atatillugu illoqarfinni/nunaqarfinni suleqatigiinnerit.

NPP aamma qinnuteqarnerit pillugit paasissutissat annertunerusut uani nassaassaapput:
http://www.northernperiphery.net. Aammattaaq soqutiginnittut oqaloqatiginninnissaat annertunernillu paasissutissanik pissarsiornissaat innersuutigineqarpoq ugguuna pissasut:

Anders la Cour Vahl
Nunatsinni Takornariaqarnermut Inuussutissarsiornermullu Siunnersuisoqatigiit 
Box 1615 
DK-3900 Nuuk
Oqaras. +299 342820
anders@greenland.com
www.inussuk.gl/EU

NPP nalinginnarmik:
Suliniutip nutaaliornikkut annertunerusukkut aamma attaveqarfiliornikkut nunani inunnik ikittuinnarnik najugaqarfiusuni unammillersinnaassutsip annertusarnissaa immikkut nakkutigisaraa.

Suliniut pisortani sullissivinnut, kattuffinnut, suliffinnut mikinerusunut, kommuninut, ilisimatusarfinnut allanullu saaffiginnippoq.

Suliniummi ikinnerpaamik pingasuulluni suleqatigiittoqassasoq, taakkunanilu ataaseq EU-mi nunameersuussasoq piumasaqaataavoq.

Suliniummi nunat tullinnguuttut peqataasuupput: Kalaallit Nunaat, Islandi, Savalimmiut aamma Norgep, Sverigep, Finlandip, Irlandip, Irlandip Avannarliup aamma Skotlandip ilaat.

Pineqarpoq ilaannakortumik aningasaliissuteqarneq, pingaarnertut najoqqutaralugu suliniummi peqataasut 50 %-inik aningaasaliissammata. Qinnuteqaatit allaffissornerillu tamarmik tuluttut oqaatsit atorlugit ingerlanneqarput.