|
Nuummi Jagtvej-imi tusagassiornermut ilinniarfiusimasoq sap. ak. 14-imi inuussutissarsiornermut pisortat aqqanillit Nunatta avannaaneersut kujataaneersullu inuttut piginnaaneqarnermikkut pikkorissarneqarnerannut atatillugu atorneqassaaq.
Inuttut piginnaaneqarnikkut pikkorissaaneq aaqqissuunneqarpoq Nunatsinni Takornariaqarnermut Inuussutissarsiornermullu Siunnersuisoqatigiinnit, pikkorissaanerlu pisussaaffinik tunniussinissamut 2008-p ingerlanerani pivisunngortinneqartussamut pilersaarutinut ilaalluni, immikkut siunertaralugu:
- Maannamut GTE-ip isumagisassaani suliassat pingaarnersarisimavaat, kisianni siunissami - aamma kommunit kattussornerannut atatillugu - suliffinnit aallarnisaasunut aamma suliffeqarfinnut tunngaviusumik siunnersuineq kommunit namminneq isumagilersussaavaat, inuussutissarsiornermut siunnersorti, Sara Heilmann oqaaseqarpoq.
Tunngaviusumik siunnersuineq ilaatigut tassaavoq suliffinnit pilersitsinermut siunnersuineq, suliassanut tunngavissatut pilersaarusiornerit, qularnaveeqqusiinissamut aamma tunisassianit ineriartortitsinermut allanullu qinnuteqaatit allallumi isumagineqarnissaat.
Pikkorissarneq sapaatip akunnera tamaat ingerlanneqassaaq, tassani pikkorissartut suliffinnit aallarnisaasunut suliffeqarfinnullu siunnersuinermut atatillugu apersuinermut suliasserinermullu apersoriaatsinut tunngasinnaasut tamaasa paasisaqarfigissavaat ilinniagaqarfigalugillu. Ilisimasanik nutaanik ilikkagaqarnissaq oqilisarniarlugu pikkorissarneq piviusuusaartitanik ilaqassaaq, tamakkulu pikkorissartut eqimattakkaarlutik pikkorissarnerup nalaani tunniunneqartut atorlugit suliariniassavaat.
Pilersaarutit malillugit tunngaviusumik inuussutissarsiornikkut siunnersuineq kommunerujussuarnut ikaartinneqarsimassaaq aamma atuutsilerneqarsimassalluni kingusinnerpaamik 2009-mi. Nunatsinni Takornariaqarnermut Inuussutissarsiornermullu Siunnersuisoqatigiilli siunissami qularnaveeqqusinermut aamma tunisassiornermi ineriartortitsinermullu tunngasunik suliarinninnermik akuutinneqassallutik.
|
