Printervenlig

Nuuk, ulloq 7. december 2007

Ilulissani Ilisimasaqarnerup Illua NTIS-ip tikilluaqquaa

Ilulissani Ilisimasaqarnerup Illua-nit pilersitsinissamut isumasiaq Ilulissani Inuussutissarsiornissamut Siunnersuisoqatigiit siulittaasuata ippassaq KNR-ikkut saqqummiussaa qamannga pisumik Nunatsinni Takornariaqarnermut Inuussutissarsiornermullu Siunnersuisoqatigiinniit tikilluaqquneqarpoq.

NTIS-imi pisortaanerup, Thomas Rosenkrands-ip Nunatta avanaa Ilisimasaqarnerup Illua-nik pilluaqquaa siunissamilu qanimut suleqatigiinnissaq qilaanaralugu.

- Kinguleqarluartumik suleqatigiinnissarput qilanaaraarput, naatsorsuutigalugu immitsinnut Ilisimanerup Illua qanimut suleqatigalugu nunap immikkoortoqarfiani Nunatta avannaaniittumi pillugu immersuuteqatigiilluassalluta. Nunap immikkoortoqarfiinik nakussassaanerup annertusiartornera peqatigalugu  NTIS-ip nuna tamakkerlugu inuussutissarsiornikkut siuarsaaneq, nunat tamat akornanni pilersaarusiorlugit piviusunngortilersaakkat, avammut tunisaqarnermut tunngasut aamma nakkutiginerulissavai, taama Thomas Rosenkrands oqaaseqarpoq.

- Ilulissani Inuussutissarsiornermut Siunnersuisartut siulittaasuat, Ole Dorph isumaqatigilluinnarparput oqarmat aatitassalerineq aamma oliesiorneq aallartillarpat piareersimanngitsutut pakasarneqassannginnatta. Tamatumunnga atatillgu nunap immikkoortuani avannaaniittumi Ilisimaqarfiup Illua iluaqutaalluartussaassaaq, Thomas Rosenkrands oqaaseqarpoq.

- Qularinngilarput Ilisimanerup Illua aqqutigalugu nunap immikkoortoq avannaaniittumi nukiit ataatsimoortilernerat pitsaasut tungaanut malugilluassagaat, soorlu NTIS-ip ataani inuussutissarsiornermut tunngasut aamma takornariaqarnermut tunngasut ataatsimoortinneqalermata nuna tamakkerlugu taamatut malugisimagaa. Taamaammat qularinngilarput nunap immikkoortoqarfiini Ilisimanerup Illuisut aaqqiissuussinerit ataatsimoorfeqarlerpata nunap immikkoortoqarfiini aamma nuna tamaat siuarianeq malugineqanngitsoornavianngitsoq.

- Ineriartortitsinermut siunnersortaatigut soorunalimi nunap immikkoortortaasa ineriartortinneqarneranni peqataalluassapput, taamaaliussappullu pingaarnerusumik isumagiutigalugit nuna tamaat takornariaqarnerup aamma inuussutissarsiornerup ineriartortinneqarneri. Taamaammat taakku sisamaallutik siunissami NTIS qitiusumik angerlarsimaffigalugu angalaartassapput. 

- Nunap immikkoortoqarfiinut pisinnaassutsinik annertusaanerput ingerlattuassavarput, soorlu taamatut maanna pisartugut. Kommunenimi inuussutissarsiornermut siunnersortit pisinnaasaasigut annertusaaffigisarpavut, taakku suliffinnit aallarnisaasunut uatsitut siunnersuisinnaassammata, maannami uagut taamaaliorpugut, Thomas Rosenkrands oqarpoq, nangillunilu:

- Ilisimanerup Illuineersut NTIS-ip misilittagaqarfigisai aallerfigisinnaassavaat, NTIS-immi ukiuni pingasuni kingullerni suliffinnit aallarnisaasunit siunnersuisarnermini piginaaffigilersimaffigisaqarmat. Ilisimanerup Illuineersut sulilersussat suleqatiginissaat taamaammat soqutigaarput, aatsaammi ataatsimoorussaqarluta ilisimasaqarnermik tunngavilimmik inuussutissarsiornermi siuariartortitsineq qulakkeersinnaavarput, taama Thomas Rosenkrands erseqqissaavsoq.

Paasissutissat annertunerusut uunga saaffiginnilluni pineqarsinnaapput:

Nunatsinni Takornariaqarneq Inuussutissarsiornermullu Siunnersuisoqatigiit pisortaanerat, Thomas Rosenkrands, oqarasuaat 342832, oqarasuaat angallattagaq 551577, thomasgreenland.com